Hezkuntzari eta bide-segurtasunari lotutako lanbideetan dihardugun pertsona taldea gara. Gure eskarmentuak eta bizipenek trafiko-istripuen prebentzioaren aldeko sentikortasuna piztu digute.

Udaltzain, ertzain, pedagogo, irakasle, psikologo, gizarte-hezitzaile, soziologo, autoeskola-irakasle eta Eusko Jaurlaritzako Trafiko Zuzendaritzako teknikari moduan egiten dugu lan, eta hezkuntzaren bitartez trafiko-istripuen kopurua murritz daitekeen uste osoak batzen gaitu. Trafiko-istripuen errealitatea ikusita, guztiok ildo berean lan egiteko ahaleginak bateratu nahi ditugu. Horrenbestez, datozen urteetarako EAEko bide-hezkuntza eredua zein izatea nahi dugun definitzea hartu dugu helburu. Txikienetatik hasi eta nagusienetara, pertsona ororen mugikortasun seguruari laguntzeko bidea emango duen trafiko-istripuei aurrea hartzeko hezkuntza-curriculum integral baten sorreran islatzen da eredu hori. Urte batean lan egin eta gero, curriculuma honako liburuan argitaratu da: "Mugikortasun Segururako Hezkuntza. Konpetentzien gida".